२-सीजर कि ख्रीष्ट?

२-सीजर कि ख्रीष्ट?

जीवन महत्त्वपूर्ण रोजाइहरूले भरिएको हुन्छ। हामीले दुईटा कुराको बीचमा एउटालाई रोज्नुपर्ने अवस्था आउँछ। जस्तै, म मण्डली सभामा जाऊँ कि घुम्‍न जाऊँ? म गृहकार्य गरूँ कि खेल्न जाऊँ? म बुबा-आमालाई सहायता गरूँ कि साथीकहाँ जाऊँ? म बाइबल पढूँ कि पत्रिका पढूँ? म बल खेल्न जाऊँ कि प्रार्थना सभामा जाऊँ? म शनिबार साथीहरूसँग बनभोज जाऊँ कि चर्च सङ्गतिमा जाऊँ? म आफ्‍नो पढ्ने काम गरूँ कि साथीसँग गफ गरेर बसूँ?

तपाईंको अगाडि आइपर्ने यस्ता अरू थुप्रै रोजाइका बारेमा आफैं पनि सोच्न सक्नुहुन्छ। सुरुका ख्रीष्टियनहरूले सीजर र ख्रीष्टको बीचमा गर्नुपर्ने एउटा महत्त्वपूर्ण रोजाइ थियो। उनीहरूले आफू ख्रीष्टतर्फ निष्ठावान् बन्ने कि सीजरतर्फ निष्ठावान् बन्ने भन्ने कुराको बीचमा रोज्नुपर्थ्यो। यसको तात्पर्य उनीहरू ख्रीष्टतर्फ निष्ठावान् बन्नुपर्छ र सीजरतर्फ निष्ठाहीन बन्नुपर्छ भन्ने कदापि होइन। प्रभु येशूले आफ्ना चेलाहरूलाई सीजरतर्फ निष्ठाहीन बन्न र तिनलाई अनादर गर्न कहिल्यै पनि सिकाउनुभएन (मत्ती २२:२१ सित तुलना गर्नुहोस्)। तर दुईटामा कसलाई पहिलो स्थान दिने भन्ने कुराको बीचमा रोज्नुपर्दा, सीजरले सधैं दोस्रो स्थान लिनुपर्छ र ख्रीष्टले सधैं पहिलो स्थान पाउनुपर्छ (हेर्नुहोस् कलस्सी १:१८ “पहिलो स्थान”)।

“सीजर” को अर्थ

“सीजर” (Caesar) उपनाम अपनाउने प्रथम व्यक्ति विश्व-विख्यात जुलियस सीजर (JULIUS CAESAR) थिए जो एक रोमी सेनापति र राजनैतिक व्यक्ति थिए। ई.पू. ४४ मा उनको हत्या गरिएको थियो (बेथलेहेममा ख्रीष्ट जन्मिनुभन्दा करिब ४० वर्ष अगाडि)। “सीजर” को उपाधि उनलाई दिइएको एउटा आदरणीय र पृथक उपनाम थियो।

येशूको जन्म हुँदा रोमका शासक को थिए (लूका २:१ हेर्नुहोस्)? ______________________________ के तिनले पनि सीजर नामको प्रयोग गरे? ________ अगस्टस (Augustus) को समयदेखि हेड्रियन (Hadrian) सम्म (११७-१३८ ई.सं.) सबै रोमी शासकहरूका निम्ति “सीजर” शब्द एउटा नाम वा उपाधि नै भयो। मिश्रका राजालाई फा________ भनिए जस्तै (हेर्नुहोस् प्रस्थान १:८,११,२२) रोमका शासकहरू सीजर भनिए।

येशू ३० वर्षको हुनुहुँदा रोमका शासक को थिए (लूका ३:१ र ३:२३ सित तुलना गर्नुहोस्)? ________________________________________ के तिनी पनि सीजर नै थिए? __________ सिक्कामा कुँदिएको अनुहार वा आकृति तिबेरियासकै थियो। प्रभु येशू क्रूसमा मारिनुहुँदा र मरेकाहरूबाट बौरनुहुँदा मानिस नै रोमका शासक थिए।

पागल नेरो

रोमका शासक नेरो (Nero) बाइबलमा उल्लेखित अर्को सीजर हुन्। प्रेरित २५:११ मा पावलले उल्लेख गरेका व्यक्ति यिनै हुन्—“म _______________ उजुर चढाउँछु।”

ई. सं. ६४ मा नेरोको शासनकालमा रोममा आगलागी भयो। छ दिन, छ रात आगो दन्किरह्यो। अधिकांश शहर खरानीमा परिणत भयो। नेरो आफैंले शहरमा आगो लगाएका हुन् भन्ने हल्ला पनि चल्यो। फलस्वरूप रोमका बासिन्दाहरूमा आफ्नै शासकको विरोधमा भयङकर ठूलो घृणा पैदा भयो। नेरोले आगजनीको दोष अरु कसैमाथि लगाउनलाई एउटा “बलिको बाख्रा” भेट्टाउनुपरेको थियो। जनताको यस्तो घृणा आफूबाट हटाउनलाई नेरोले आगजनीको दोष ख्रीष्टियनहरूलाई लगायो। निश्चय पनि यो आरोप सत्य थिएन, तर परिणामस्वरूप ठूलो सङ्ख्यामा ख्रीष्टियनहरू गिरफ्तार गरिए र त्यसपछि ख्रीष्टियनहरूमाथि भयानक सतावट ओइरिन थाल्यो।

यस भीषण आगजनीको करिब ५० वर्षपछि एकजना ट्यासिटस् (Tacitus) नाम गरेका रोमी इतिहासकारले उक्त घटनाको बारेमा लेखेका थिए। तिनको भनाइ यस्तो छ:

“आफ्‍नो विरुद्धमा फैलिरहेका हल्लाहरूलाई दबाउन, नेरोले केही मानिसहरूलाई दोष्याए र शारीरिक यातना दिए जोहरू उनीहरूका खराब रीतिहरूका कारण घृणाका पात्र बन्न पुगेका थिए अर्थात् “ख्रीष्टियन” भनी चिनिने समूहका मानिसहरू। यस पन्थका संस्थापक ख्रीष्टलाई तिबेरियस सम्राटको शासनकालमा यहूदियाका राज्यपाल पोन्तियस पिलातसद्वारा फाँसी दिइएको थियो।

“आफूलाई ख्रीष्टियन भन्नेहरू सुरुमा गिरफ्तार गरिए। त्यसपछि उनीहरूबाट लिइएको सूचनाको आधारमा सयौंलाई दोषी ठहराइयो, आगजनीको आरोपमा भन्दा पनि उनीहरूको समाज-विपरित आस्थाको लागि। उनीहरूको मृत्युमा उनीहरूको खिल्ली उडाइयो। उनीहरूलाई जङ्गली पशुका छाला पहिराइयो, कुकुरहरूद्वारा च्यातचुत पारियो, क्रूसमा टँगाइयो र रात परेपछि आगोका राँकाझैं बलून् भनी जिउँदै जलाइयो। त्यो दृश्य हेर्न नेरोले आफ्‍नै बगैँचाहरू यसका लागि प्रायोग गरे र रङ्घशालामा पनि प्रदर्शन गरे। त्यसबेला तिनी आफै पनि भीडसित मिसिन्थे वा सारथीको भेषमा रथमा चढेर उभिन्थे। परिणामस्वरूप, यद्यपि तिनीहरू ख्रीष्टियन भएकाले दोषी थिए र मृत्युदण्डका योग्य थिए, मानिसहरूलाई तिनीहरूको निम्ति दुःख लाग्न थाल्यो। किनभने तिनीहरूको संहार जनहितको लागि नभई एउटा मान्छेको पागलपनको तृप्तिको लागि भइरहेको थियो भन्ने कुरा उनीहरूले महसुस गर्न थाले।”

(Tacitus Annals 15.44)

पत्रुस र पावल शहीद बनेका यिनै पागल र दुष्ट शासक नेरोको शासनकालमा नै हो। पत्रुसलाई उँधोमुन्टो पारेर क्रूसमा टाँगिएको थियो र पावलको शिर काटिएको थियो।

सीजरलाई म के दिऊँ?

मत्ती २२:१५-१८ मा केही यहूदीहरू धूर्त चाल मार्दै येशूलाई पासोमा पार्न उहाँकहाँ आए। जस्तो जवाफ दिए पनि उहाँलाई दोष्याउन सकिने प्रश्न गरे: “______________ कर तिर्नु उचित छ कि छैन?” (मत्ती २२:१७)।

येशूले मानौं यस्तो भन्नुभयो, “उचित छ, हामीले सीजरलाई कर तिर्नै पर्छ।” यो जवाफले कसलाई रिस उठाउनेथ्यो? स्मरण होस्, यहूदीहरू रोमी शासनमुनि बस्न पटक्कै चाहँदैनथे।

येशूले मानौं यस्तो भन्नुभयो, “उचित छैन, हामीले सीजरलाई कहिल्यै पनि कर तिर्नुहुँदैन। तिमीहरूले आफ्नो कर नतिर्नू!” येशूले यदि यसो भन्नुभएको भए, उहाँका शत्रुहरूले के गर्नेथिए? एउटा यहूदी शिक्षकले मानिसहरूलाई कर नतिर्नू भनी सिकाइरहेको कुरा सुनेर के रोमी अधिकारीहरू खुशी हुनेथिए? रोमी शासनको विरुद्ध विद्रोह उभाडेको भन्दै के प्रभुलाई दोष आउन सक्थ्यो?

प्रभु येशू उनीहरूको जालमा पर्नुभएन। तर बरू उहाँले मत्ती २२:२१ मा पाइने आफ्नो प्रख्यात जवाफ दिनुभयो। यी शब्दहरू सुनेपछि, उहाँका शत्रुहरूले के गरे (मत्ती २२:२२)? ________________________________________

सीजरका कुराहरू सीजरलाई देओ

हामीले आज यो आज्ञा कसरी पालन गर्न सक्छौं? हाम्रो राज्य-सरकार र हाम्रा अगुवाहरू प्रति हाम्रो के कस्तो जिम्मेवारी छ? हामीले उनीहरूलाई र उनीहरूका निम्ति के गर्नुपर्छ? के उनीहरू हाम्रो आदर र निष्ठा पाउने योग्यका छन् (१ पत्रुस २:१३, १४, १७)? के हामीले उनीहरूका निम्ति प्रार्थना गर्नुपर्छ (१ तिमोथी २:१-३)? के हामीले हाम्रा करहरू तिर्नुपर्छ? हामीमध्ये हरेक कस्तो किसिमको नागरिक हुनुपर्छ? जिम्मेवार नागरिकहरूको रूपमा, हामीले के-कस्ता कर्तव्यहरू निभाउनुपर्छ? तपाईंको देशले तपाईंलाई के दिएको छ? तपाईंले आफ्नो देशलाई के दिनुपर्छ? के प्रहरीमा काम गर्दै तपाईंको देशको सेवा गर्ने मानिसहरूप्रति र आफ्नो कर्तव्य निभाउँदै युद्धभूमिमा आफ्नो ज्यान दिनेहरूका निम्ति तपाईं धन्यवादी हुनुहुन्छ?

परमेश्वरका कुराहरू परमेश्वरलाई देओ

हामीले आज यो आज्ञा कसरी पालन गर्न सक्छौं? परमेश्वरतर्फ र परमेश्वरको वचन, बाइबलतर्फ हाम्रो के कस्तो जिम्मेवारी छ? के परमेश्वर हाम्रो सम्मान र निष्ठा पाउने योग्यका हुनुहुन्छ (१ पत्रुस २:१७)? के हामीले उहाँसित प्रार्थना गर्नुपर्छ? के हामीले उहाँका वचनहरू पढ्नुपर्छ? परमेश्वरको सामु म कस्तो किसिमको मानिस हुनुपर्छ? जिम्मेवार विश्वासीको रूपमा, मैले के-कस्ता कर्तव्यहरू निभाउनुपर्छ? तपाईंका आत्मिक जिम्मेवारीहरू के-कस्ता छन्? तपाईंको निम्ति परमेश्वरले के गर्नुभएको छ र उहाँले तपाईंलाई के दिनुभएको छ? तपाईंले परमेश्वरको निम्ति के गर्नुभएको छ र परमेश्वरलाई के दिनुभएको छ? के तपाईं एउटा असल ख्रीष्टिय सिपाही हुनुहुन्छ? के तपाईंले परमेश्वरको सेवा गर्दैहुनुहुन्छ? तपाईंको घरमा, स्कूलमा र अन्य जुनसुकै ठाउँहरूमा के तपाईंले आफ्नो विश्वासको असल लडाइँ लड्दै हुनुहुन्छ?

एउटा तुलना

निम्न तालिकामा सीजर र ख्रीष्टको बीचमा सङ्क्षिप्त तुलना प्रस्तुत छ:

रोज्नैपर्छ

माथिको तालिकाको बारेमा विचार गर्दा, सीजरलाई ख्रीष्टसँग तुलना गर्न नै सकिन्न। एउटा मानिसले ख्रीष्टको सट्टामा सीजरलाई कसरी रोज्न सक्छ र? तरैपनि, मानिसहरूले यही नै गरिरहेका छन्। उनीहरूले ख्रीष्टलाई इन्कार गरेका छन् र उहाँको सट्टामा सीजरलाई आदर गरेका छन्।

यूहन्ना १९:१२ लाई विचार गर्नुहोस्। पिलातस रोमी शासक थिए। तिनी रोमी सम्राट (सीजर) प्रति निष्ठावान हुनुपर्थ्यो। सीजरले आफैंलाई सर्वोच्च शासकको रूपमा हेर्ने गर्थे। उनले आफैंलाई राजाहरूका राजाको रूपमा हेर्ने गर्थे। यूहन्ना १९:१२ मा आफैंलाई राजा ठहराउने जोसुकैको विरोधमा सीजर हुनेछन् भनेर यहूदीहरूले पिलातसलाई सम्झना गराउँदैथिए। सीजर कुनै प्रतिस्पर्धी चाहँदैनथिए।

त्यसपछि यूहन्ना १९:१५ मा पिलातसले यहूदीहरूलाई एउटा कुरा रोज्न गर्न बाध्य गराए। के तिमीहरूका राजालाई म क्रूसमा टाँगूँ? यहूदी अगुवाहरूले के जवाफ दिए? ‌__________________________________________

सीजरलाई ख्रीष्टसँग तुलना गरिएको तालिकालाई सम्झना गर्नुहोस्। यहूदीहरूले दाहिने पट्टि हुनुभएकोलाई छोडेर देब्रे पट्टि भएकोलाई रोजे! कस्तो मूर्ख रोजाइ! यहूदीहरूले सीजरलाई घृणा गर्दथे र रोमीहरूले आफूमाथि शासन गरेको कुरालाई घृणा गर्दथे, तरैपनि ख्रीष्ट प्रतिको तिनीहरूको घृणाले सीजरप्रतिको तिनीहरूको घृणालाई पनि उछिन्यो। _____________ बाहेक हाम्रो अरू राजा नै छैन। (एउटा निष्ठावान ख्रीष्टियनले के भन्नुपर्छ? ______________ बाहेक मेरो अरू राजा नै छैन।)

सीजर पूजा

रोमी सम्राज्यका शासकहरू राजनीतिक अगुवा मात्र नभएर धार्मिक अगुवा पनि हुन्थे। शासकलाई पोन्टिफेक्स् म्याक्सिमस् (PONTIFEX MAXIMUS), अर्थात् प्रमुख पूजाहारी (मूल पूजाहारी, अग्र पङ्क्तिको पूजाहारी) भनेर पनि चिनिन्थ्यो। तिनको ओहोदा यति उच्च थियो कि तिनी ईश्वरीय उपासनाको पात्र पनि बनेका थिए।

ओहोदा  र शक्ति मानिसको काँधमाथि आएपछि निजले आफू नै सबै भन्दा महान् हुँ भन्ने सोच्न पुग्नु अति सजिलो हुन्छ। आफ्नो सामु हरेक पल्ट मानिसहरू निहुरेर सेवा पाउने बानी भएका राजाहरू र सम्राटहरूमा यो झन् बढी सजिलो हुन्छ। उनीहरूले आफ्नो उपासना गरिनुपर्छ भनी सोच्न थाल्छन्। के नबूकद्नेस्सर (बेबिलोनका महान् शासक) यही जालमा परेका थिए (दानियल ३ अध्याय)? __________ उनलाई परमेश्वरले के-कस्ता पाठहरू सिकाउनुभयो (दानियल ४:३१-३७)?

रोमी सरकारले विभिन्न धर्महरूलाई अनुमति दिएको थियो। उनीहरूले मानिसहरूलाई उनीहरूका विभिन्न मूर्तीहरूको पूजा गर्न र उनीहरूका विभिन्न धार्मिक रीतिहरू मान्न अनुमति दिन्थ्यो। रोमीहरूले यहूदी मानिसहरूलाई उनीहरूको धर्म मान्न, पशु बलिदान गर्न र मन्दिरमा उपासना गर्न समेत अनुमति दिन्थे (कम्तीमा पनि ई. सं. ७० मा यरूशलेमको शहर नाश नभएसम्म; त्यसपछि रोमीहरूद्वारा मन्दिर नष्ट गरियो)।

रोमीहरूले अरू धर्महरूलाई सहे तापनि र तिनीहरुमाथि आस्था राख्ने अनुमति दिए तापनि, मानिसहरूले कम्तीमा पनि वर्षको एक पटक सीजरको महानतालाई स्वीकार गरेको उनीहरू चाहन्थे। मानिसहरूले सार्वजनिक रूपमा सीजरलाई आफ्नो पूर्ण राजनिष्ठा दिएको र तिनको महानतालाई मानिलिएको चाहन्थे। उदाहरणको निम्ति, सन् २५० ई.सं. मा डेसियस (Decius) ले एउटा नियम लागु गरे जसमा मानिसहरूले कम्तिमा पनि वर्षको एकपटक रोमीहरूको वेदीमा देवताहरूलाई बलिदान चढाउनुपर्थ्यो र त्यसै वखत शासकको उत्कृष्टता र महानतालाई पनि स्वीकार्नुपर्थ्यो। त्यस्तो बलिदानहरू चढाउनेलाई विशेष प्रमाण-पत्र दिइन्थ्यो। त्यस्ता प्रमाण-पत्रहरू नपाउने वा नलिने व्यक्तिहरूलाई अकसर सताइन्थ्यो।

सुरुका ख्रीष्टियनहरूले शासकलाई र तिनको मूर्तिलाई ईश्वरीय आदर चढाउन इन्कार गरे। ख्रीष्टियनहरूले महान् शासकको वेदीमा एक चिमटी धूपौरो चढाउन पनि इन्कार गरे। यस्ता समयहरू आउँछन् जब परमेश्वरका जनहरू मानिसहरूको सामु झुक्न इन्कार गर्नुपर्छ। यस्ता समयहरू हुन्छन् जब परमेश्वरका जनहरूले उहाँको आज्ञा पालन गर्नको निम्ति राजाको आज्ञा पालन गर्नुहुँदैन। यस्ता समयहरूको बारेमा दानियल ३ र ६ अध्यायमा राम्रा उदाहरणहरू प्रस्तुत गरिएका छन्।

सुरुका ख्रीष्टियन समूहहरूको बीचमा रोमी अधिकारीहरू आएर यसो भनेको कल्पना गर्नुहोस्, “हाम्रो हुकुमसित सहमत हुनोस् नत्र तिमीहरू साँच्चै समस्यामा पर्नेछौ। तिमीहरूको मुखले सीजर नै प्रभु हुनुहुन्छ भनी स्वीकारेको मात्र हामीले चाहेका हौं। सीजर नै सार्वभौम हुनुहुन्छ भनेर मानिदेऊ मात्र। सीजर नै परमप्रधान हुनुहुन्छ र यदि तिमीहरूले यति कुरा मानिलियौ भने हामी तिमीहरूलाई एउटा प्रमाण-पत्र दिनेछौं। हामी तिमीहरूलाई आफ्नै ईश्वरहरूको उपासना गर्न र तिमीहरूको आफ्नै धार्मिक रीतिहरू पूरा गर्न दिनेछौं, तर तिमीहरूले कम्तीमा पनि वर्षको एक पटकचाहिँ “सीजर नै परमप्रधान हुनुहुन्छ! सीजर नै प्रभु हुनुहुन्छ!” भनेर आफ्नो वफादारीता र भक्ति देखाएको हामी चाहन्छौं।”

तपाईं यी सुरुका ख्रीष्टियनहरूमध्येमा हुनुभएको भए, तपाईंले के गर्नुहुन्थ्यो? किन? यसो गरिएको खण्डमा के मूल्य चुकाउनुपर्थ्यो होला? यसो नगर्नुको मूल्यचाहिँ के हुनेथियो होला?

ख्रीष्टप्रतिको वफादारिता र सीजरप्रतिको वफादारिताको बीचमा रोज्नुपर्दा, सीजर दोस्रो स्थान लिन बाध्य हुन्थ्यो। हामीले ख्रीष्टको पहिलो स्थानलाई अरू कुनै पनि मानिसलाई खोस्न दिनुहुँदैन। मानौं इस्लामी आतङ्ककारीहरूले बल-जफती गरेर हाम्रो देशलाई आफ्नो हातमा लिएछन्। मानौं उनीहरूले सबैजनालाई आफ्नो मुखले यस्तो वाक्य स्वीकार गर्न बाध्य गराएछन्, “अल्लाह नै मेरो परमेश्वर हुनुहुन्छ र मोहम्मद नै उहाँको अगमवक्ता हुनुहुन्छ। येशू ख्रीष्ट मेरो परमेश्वर हुनुहुन्न। म हरेक मानिस र अन्य हरेक वस्तुभन्दा बढी अल्लाह प्रति वफादार हुनुपर्छ!” यसो भन्न इन्कार गर्नेहरू दण्डित गरिनेछन् र कसैकसैलाई मारिनेछ। तपाईं के गर्नुहुन्थ्यो?

के तपाईंको विचारमा आज हाम्रो संसारमा यस्ता ठाउँहरू होलान् जहाँ विश्वासीहरू मानिसहरूको सामु घुँडा टेक्न र ख्रीष्टलाई इन्कार गर्न नमानेको कारणले सताइन्छन् र मारिन्छन्? हरेक ख्रीष्टियनले त्यहाँ केवल _____________ प्रभु हुनुहुन्छ भनेर मानिलिन्छ (एफेसी ४:५)। यो साँचो हो, धेरै मानिसहरूले आफैंलाई प्रभु भन्छन् र आफैंलाई माथि उचाल्छन् (१ कोरिन्थी ८:५), तर त्यहाँ प्रभु भनेर बोलाइने योग्यको केवल एकजना मानिस मात्र हुनुहुन्छ! मानिसहरूले यो व्यक्तिगत रोजाइ गर्नैपर्छ: के म उहाँलाई मेरो प्रभु हुन दिऊँ कि नदिऊँ?

येशू ख्रीष्टको प्रभुत्व

मानिसहरूले सीजरलाई प्रभु माने तापनि, सीजर प्रभु होइनन्। यशैया २६:१३ मा हामी पढ्छौं, “हे परमप्रभु हाम्रा परमेश्वर, ____________बाहेक अरू __________ले हामीमाथि अधिकार जमाएका छन्।” तपाईंबाहेक अरू प्रभुहरू। मानिसको समस्या यही हो। उसले अरू प्रभुहरूलाई परमप्रभुको स्थान जमाउन दिन्छ। उसले ख्रीष्टको ठाउँलाई सीजरहरूलाई सुम्पन्छ।

के तपाईंको जीवनमा ख्रीष्टको स्थान लिइरहेका कुनै “प्रभुहरू” छन्? के तपाईंले उपासना गरिरहनुभएको र दण्डवत् गरिरहनुभएको त्यहाँ कुनै “सीजरहरू” छन्?

धेरै मानिसहरूको हृदयभित्र ”म” नाम गरेको सीजर हुन्छ। यो भनिनेलाई उच्च पारिन्छ, उचालिन्छ र पहिलो स्थान दिइन्छ। ”म”लाई प्रभु बनाइन्छ! मानिसले “म” लाई आदर गर्छ, “म” को सेवा गर्छ र “म” को निम्ति जिउँदछ। ख्रीष्टले ओंठको सेवा त पाउनुहोला तर वास्तविक सेवाचाहिँ ”म”ले पाउँदछ। के तपाईंको जीवनमा यही समस्या छ? यसको बारेमा के गर्न सकिन्छ?

विश्वासीहरू भएको हुनाले हामीलाई येशू नै प्रभु हुनुहुन्छ भनी हाम्रो मु______ले स्वीकार गर्नुपर्छ (रोमी १०:९)। के तपाईंले यसो गर्नुभएको छ? येशू ख्रीष्ट नै तपाईंको प्रभु हुनुहुन्छ भनेर के अरूहरूले जान्दछन्? उनीहरूले यो कसरी जान्दछन्? तपाईंले यो कसरी देखाउनुहुन्छ? के तपाईंका स्कूलका साथीहरूले जान्दछन्? एउटा व्यक्तिले इमानदारीतामा र सत्यतामा ख्रीष्टलाई स्वीकार गर्न सक्नको निम्ति येशू ख्रीष्टलाई प्रभुको रूपमा प्राप्त गर्नु भनेको साँच्चै के हो भनी जान्नलाई निजलाई सहायता गर्ने को हुनुहुन्छ (१ कोरिन्थी १२:३)? ____________________________ के सुरुका ख्रीष्टियनहरूले ख्रीष्टलाई प्रभुको रूपमा स्वीकार गरे (प्रेरित २:३६; १०:३६; १७:२४)?

के ख्रीष्ट साँच्चै प्रभु हुनुहुन्छ? के उहाँ साँच्चै मेरो प्रभु हुनुहुन्छ? हुनुहुन्छ भने, यसको अर्थ के हो? के मेरो प्रभुले मबाट केही कुराको माग गर्नुहुन्छ? हरेक विश्वासीले सोच्नुपर्ने र सम्झना गर्नुपर्ने केही कुराहरू यस प्रकार छन्:

१. प्रभुत्वले आज्ञाकारिताको माग गर्दछ।

उहाँ हाम्रो प्रभु हुनुहुन्छ भनी हामी दाबी गर्छौं भने हामीले के गर्नुपर्छ (लूका ६:४६)? _______________________________________ पावलले सुरुमा मुक्ति पाउँदा आफ्नो प्रभुप्रति पावलको अवधारणा कस्तो थियो (प्रेरित ९:६)? _________________________________________ ख्रीष्टलाई प्रभु भनी सम्बोधन् गर्नु र त्यसपछि उहाँले भन्नुभएका कुराहरूलाई बेवास्ता गर्नु र अवज्ञा गर्नु किन नमिल्ने कुरा हो?

२. प्रभुत्वले सेवाको माग गर्दछ।

हामीले कसको सेवा गर्दछौं (रोमी १२:११)? _______________________ हाम्रो सेवाको बारेमा कलस्सी ३:२३-२४ ले के भन्दछ?__________________________________

हामीले हरदिन कसलाई खुशी पार्न खोज्नुपर्छ (एफेसी ५:१०, “मनपर्ने” शब्दको अर्थ हो “अति प्रसन्न तुल्याउने”)? __________________ सीजरका मानिसहरूमध्ये कसैले उसको सेवा गर्न इन्कार गर्यो भने उसले के गर्नेथियो होला?

३. प्रभुत्वले सङ्गतिको माग गर्दछ।

हाम्रा परमेश्वरले हामीलाई केको निम्ति बोलाउनुभएको हो (१ कोरिन्थी १:९)?  __________________________________________

परमेश्वरका पुत्र येशू ख्रीष्टलाई यहाँ हाम्रा ______________ भनिएको छ। औसत रोमी नागरिकले महान् सम्राट सीजरसँग सङ्गति गर्न पाउँदैनथियो। सामान्य मानिस सीजरको सामु पुग्न सक्दैन थियो। उसको नजिक जान र ऊसँग कुरा गर्न त झनै गाह्रो हुन्थ्यो। आफ्नो प्रभुसँग विश्वासीको सम्बन्ध यो भन्दा कत्तिको भिन्न छ?

४. प्रभुत्वले प्रेमको माग गर्दछ।

प्रभुलाई प्रेम नगर्नेहरूको बारेमा पावलले के भने (१ कोरिन्थी १६:२२)? __________________________________________ अधिकांश रोमीहरूले प्रेमको कारणले नभई बाध्यताको कारणले सीजरको सेवा गर्दथे (किनभने यो उनीहरूको चाहना थिएन, तर उनीहरूको बाध्यता थियो)। तपाईंले चाहिँ ख्रीष्टको सेवा प्रेमले गर्नुहुन्छ कि बाध्यताले? मण्डली आउनु तपाईंको चाहना हो कि बाध्यता? तपाईंलाई बाइबल पढ भनेर भन्ने त्यहाँ कोही नभएको भए के तपाईं आफैं बाइबल पढ्नुहुन्थ्यो होला?

एकदिन सबै मानिसहरूले के गर्नेछन् (फिलिप्पी २:९-११)? _________________________________________

के बिगतका सबै सीजरहरू एकदिन ख्रीष्टको सामु उभिएर आ-आफ्ना घुँडा टेक्नेछन्? के उनीहरूले येशू नै प्रभु हुनुहुन्छ भनी स्वीकार गर्नेछन्? के तपाईंले यसो गर्नुभयो? कि त प्रेमले नै आज यसो गर्नुहोस् नत्र ता तपाईंले भविष्यमा बाध्यताले यसो गर्नुपर्नेछ!

“अनि तिमीहरू किन मलाई ‘हे प्रभु, हे प्रभु’ भन्दछौ, 
र मैले भनेका कुराहरूचाहिँ पालन गर्दैनौ?”
(लूका ६:४६)

सीजर होइन, तर ख्रीष्ट नै प्रभु हुनुहुन्छ!
के यो सत्यताले तपाईंको जीवनलाई बदलेको छ?
के तपाईं उहाँको प्रभुत्वप्रति समर्पित हुनुहुन्छ,
र उहाँलाई नै तपाईंको जीवनमा उहाँको मार्ग र स्वामित्व पूरा गर्न दिरहनुभएको छ?

यो अध्ययन माला मीडलटाउन बाइबल चर्चद्वारा प्रकाशित सामग्रीबाट नेपालीमा अनुवाद गरिएको हो। यसलाई अध्ययन गर्दा ट्रिनिटेरियन बाइबल सोसाइटी (TBS) द्वारा प्रकाशित पवित्र बाइबल प्रयोग गर्नुभयो भने तपाईंलाई सहज हुनेछ। तपाईंलाई एकमात्र सत्य परमेश्वर र उहाँका पुत्र प्रभु येशू ख्रीष्टको व्यक्तिगत ज्ञानमा आइपुग्न र त्यसमा बढ्दै-बढ्दै जान पवित्र आत्माले यी अध्ययनहरूलाई प्रयोग गर्नुभएको होस्! (१ पत्रुस २:२; २ पत्रुस ३:१८)

१-पत्रुस कि चट्टान?

१-पत्रुस कि चट्टान?

 

पाठकलाई मण्डली इतिहास बुझ्न सहायता मिलोस् भन्ने हेतुले यी पाठहरू तयार गरिएका हुन्। विगतबाट गहकिला पाठहरू सिक्‍न परमेश्वरले सहायता गर्नुभएको होस्। इतिहासबाट नसिक्‍नेहरूले विगतकै गल्तीहरू दोहोर्‍याउने जोखिम उठाउँछन्। विगतबाट सिकेर वर्तमानमा धार्मिकतापूर्वक जिउन सहायता मिलेको होस्।

मत्ती १६:१३ मा सोधिएको चाबी प्रश्न के हो?

_________________________________

यदि तपाईंले आज कसैलाई उक्त प्रश्न सोध्नुभयो भने जवाफ कस्तो आउला? स्कूलका साथीबाट? शिक्षक वर्गबाट? छिमेकीबाट? के यो प्रश्न महत्त्वपूर्ण छ? किन छ वा किन छैन?

मत्ती १६:१३ मा सोधिएको र मत्ती १६:१५ मा सोधिएको प्रश्नका बीच के भिन्नता छ? तपाईंले मत्ती १६:१५ को प्रश्नलाई कसरी जवाफ दिनुहुन्छ? पत्रुसले दिएको जवाफ के थियो (मत्ती १६:१६)? _____________________________ पत्रसुको जवाफ सही थियो कि गलत (१७ पदसँग तुलना गर्नुहोस्)? _________________ पत्रुसले यी सत्यता कसरी जाने? उनको तिक्ष्ण बुद्धि भएकोले हो? वा उत्कृष्ट विद्यालय वा विश्व-विद्यालयमा पढेकाले वा कुनै स्तरीय गोष्ठीमा भाग लिएकाले? पत्रुसको आत्मिक समझ र ज्ञानको रहस्य के थियो (मत्ती १६:१७)? ______________________________________ तपाईंको आत्मिक समझको स्रोत के हो (१ कोरिन्थी २:९-१५)? के तपाईं आफैंले सत्यता बुझ्न सक्नुहुन्छ, कि परमेश्वर आफैंले यी कुराहरू तपाईंलाई प्रकट गरिदिनुहुन आवश्यक छ? ___________________________

के पत्रुस प्रथम पोप थिए त?

मत्ती १६:१८ एउटा ज्यादै महत्त्वपूर्ण पद हो। तर यो ज्यादै गलत तरिकाले बुझिएको र गलत तरिकाले अर्थ लगाइएको पद पनि हो। यस पदमा प्रभुले भन्नुभएको खास कुरा यो थियो: “अनि म पनि तिमीलाई भन्दछु, तिमी ______________ हौ, र यस _____________माथि म _________ ______________ बनाउनेछु, अनि नरकका ढोकाहरू यसमाथि विजयी हुनेछैनन्” (मत्ती १६:१८)।

यी शब्दहरूलाई हामीले कुन अर्थमा बुझ्नुपर्छ? के येशूले पत्रुसको कुरा गर्दै हुनुहुन्थ्यो? अनि येशूले मण्डलीको बारेमा के भन्दै हुनुहुन्थ्यो? अनि येशूले आफ्‍नो बारेमा के भन्दै हुनुहुन्थ्यो? अनि “चट्टान” भनेको को हो? चाबी प्रश्न यही हो।

यस पदभित्र केही सुस्पष्ट र महत्त्वपूर्ण शिक्षाहरू छन्। मत्ती १६:१८ अनुसार, मण्डलीका निर्माता को हुनुहुन्छ? “म आफ्नो मण्डली बनाउनेछु”: यो भन्ने को हुनुहुन्छ? ___________________ कहिल्यै बिर्सन नहुने एउटा सत्यता यही हो। येशू ख्रीष्ट नै मण्डलीका महान् निर्माता हुनुहुन्छ। मण्डली उहाँद्वारा निर्माण गरिएको हो। मण्डली कुनै मानिसद्वारा निर्माण गरिएको होइन, यो त परमप्रभुद्वारा निर्माण गरिएको हो! मत्ती १६:१८ अनुसार, यो मण्डली कसको हो? येशूले भन्नुभयो, “म _________ मण्डली बनाउनेछु।” के कुनै पास्टरले घमण्ड गर्दै “यो मेरो मण्डली हो!” भन्नु सही हो? एल्डर वा डिकनले त्यसो भन्नु सही हो? मण्डली येशू ख्रीष्टको हो। यो उहाँको मण्डली हो! मानिसहरूले अक्सर “त्यो मेरो मण्डली हो,” भन्ने गर्छन् तर वास्तवमा मण्डली उहाँको हो भनेर हामीलाई सधैं सम्झाइनुपर्छ।

यस पदमा स्पष्टसाथ सिकाइएको अर्को कुरा पनि छ। मत्ती १६:१८ अनुसार, मण्डली ख्रीष्टद्वारा बनाइएको हो (उहाँ निर्माता हुनुहुन्छ) र मण्डली ख्रीष्टको हो (यो उहाँको मण्डली हो) र मण्डली च___________माथि बनाइएको छ। मण्डली माटो वा बालुवामाथि बनाइएको छैन। मण्डली एउटा बलियो चट्टानमाथि बनाइएको छ।

एउटा भवनको लागि त्यसको जग एकदम महत्त्वपूर्ण हुन्छ। भवनको जग राम्रो हुनुपर्छ र यो जग बलियो हुनैपर्छ। येशू ख्रीष्टको मण्डली बलियो चट्टानको जगमाथि बनाइएको छ। जब परमेश्वरले केही कुरा बनाउनुहुन्छ, उहाँले त्यो असल बनाउनुहुन्छ। उहाँले यसलाई बलियो आधारमाथि राख्नुहुन्छ। मण्डली चट्टानमाथि बनाइएको छ। तर यो चट्टान भनेको को हो? चाबी प्रश्न यही हो।

क्याथोलिक चर्चको जवाफ

हामीमध्ये कतिलाई रोमन क्याथोलिक चर्चको बारेमा केही कुरा थाहा होला र कतिले क्याथोलिक व्यक्तिहरूलाई भेटेका पनि छौं होला। हामीले हेरिरहेको यस पद (मत्ती १६:१८) लाई क्याथोलिक शिक्षकहरूले आफ्नो विश्वासको एउटा प्रमुख बुँदालाई समर्थन गर्न प्रयोग गर्ने गर्छन्।

यो चट्टान को हो? क्याथोलिक मण्डलीको अडान यस्तो छ: यो चट्टान पत्रुस हो। जुन बलियो चट्टानमाथि मण्डली बनाइएको छ त्यो चट्टान पत्रुस नै हो भनी उनीहरू विश्वास गर्दछन्। येशू ख्रीष्टको मण्डली पत्रुसमाथि बसालिएको हो भनी उनीहरू विश्वास गर्दछन्। ख्रीष्ट निर्माता हुनुहुन्छ, मण्डली ख्रीष्टको हो, तर पत्रुसचाहिँ मण्डलीका जग हुन्। यो पदलाई उनीहरूले यसरी बुझ्ने गर्छन्: “तिमी पत्रुस हौ, र यस चट्टान (पत्रुस) माथि म आफ्नो मण्डली बनाउनेछु” (मत्ती १६:१८)।

ख्रीष्टले पत्रुसलाई प्रथम पोपको रूपमा नियुक्त गर्नु भएको हो भनेर क्याथोलिक मण्डलीले विश्वास गर्छ। येशू ख्रीष्टका शब्दहरूलाई उनीहरू यसरी बुझ्छन्: “पत्रुस, म मेरो मण्डली तिमीमाथि बनाउनेछु। तिमी नै पहिलो पोप हुनेछौ र तिमी नै मण्डलीको दृश्यमान शिर हुनेछौ।”

आज हाम्रो संसारमा एकजना विशिष्ट र प्रभावशाली मानिस छन् जसलाई “पोप” भनिन्छ। खबरहरूमा अक्सर तिनको उल्लेख गरिन्छ र तिनलाई देखाइन्छ। समय-समयमा तिनले देश-विदेश भ्रमण गर्दछन्। ख्रीष्टमस, इस्टर र वर्षभरीका अन्य विभिन्न समयहरूमा आयोजना गरिएका धार्मिक कार्यक्रमहरूलाई तिनले नै सञ्चालन गरिरहेको देख्न सकिन्छ। जहीँ-तहीँका क्याथोलिक मानिसहरूले तिनलाई आफ्नो अगुवा र शिरको रूपमा हेर्ने गर्छन्। पोपको बारेमा तपाईंलाई कत्तिको ज्ञान छ? तिनी को हुन् र तिनका अधिकारहरू के-कस्ता छन्? उनको बारेमा क्याथोलिक मानिसहरूले के विश्वास गर्छन्?

क्याथोलिक शिक्षा अनुसार, पोप को हुन्? उनीहरूको जवाफ यस्तो छ:

“पोप भनेको सन्त पत्रुसको वैधानिक उत्तराधिकारी र मण्डलीका दृश्यमान शिरको रूपमा यस पृथ्वीमा ख्रीष्टका प्रतिनिधि हुन्। जसरी मानव शरीरमा एउटा शिर हुन्छ, ठीक त्यसरी नै मण्डलीको एउटै शिर ख्रीष्ट हुनुहुन्छ। पोपचाहिँ यस पृथ्वीमा उहाँको प्रतिस्थापक (Vicar, कसैको विकल्पमा काम गर्ने व्यक्ति), वा प्रतिनिधि, वा मण्डलीका दृश्यमान शिर हुन्।” (बाल्टिमोर क्याटेकिज्म, Baltimore Catechism)।

क्याथोलिक मण्डलीले विश्वास गर्दछ कि पत्रुस “ख्रीष्टले स्थापना गर्नुभएको मण्डलीको शिर, वा पहिलो पोप हुनका निम्ती उहाँद्वारा चुनिएका प्रेरित” हुन् (बाल्टिमोर क्याटेकिज्म)। मत्ती १६:१८ मा येशूले पत्रुससँग बोल्दाहुँदी उहाँले पत्रुसलाई प्रथम पोप, उहाँको प्रतिनिधित्व गर्नेवाला र संसारमा मण्डलीको दृश्यमान शिरको रूपमा उहाँको स्थान लिने व्यक्तिको रूपमा नियुक्त वा अभिषेक गर्दै हुनुहुन्थ्यो।

साथै, पत्रुस धेरै पोपहरूमध्येका केवल प्रथम पोप मात्र हुन् भनेर उनीहरू विश्वास गर्छन्।

“समस्त मण्डलीको प्रधान शिक्षक र शासक हुने विशेष अधिकार सन्त पत्रुस एक्लैले अभ्यास गरून् भन्ने आशय ख्रीष्टको थिएन, तर यो अधिकार तिनको उत्तराधिकारी, अर्थात् पोप वा रोमको अध्यक्षहरूमा सर्दै जाओस् भन्ने आशय थियो, जोचाहिँ संसारमा ख्रीष्टको सहायक पादरी र मण्डलीको दृश्यमान शिर हुन् (बाल्टिमोर क्याटेकिज्म, Baltimore Catechism)।

“के पत्रुसको अधिकार उहाँको मृत्युपश्चात् अन्त भयो? भएन, यो त उहाँको मृत्युपछि (ई. सं. ७८) लिनस् नामक मानिसलाई सुम्पिइयो, त्यसपछि क्लेटसलाई (९० ई. सं.), र त्यसपछि क्लेमेन्टलाई (१०० ई.सं.), र त्यसपछि अर्कोलाई अनि त्यही क्रममा अर्कोलाई गर्दै करिब २००० वर्षदेखि यसरी हस्तान्तरण हुँदै आएको छ।” — विलियम जे. कोगनद्वारा लिखित अ ब्रीफ क्याटेकिज्म फर एडल्ट्स, पृ. ६० (William J Cogan, A Brief Catechism For Adults)।

क्याथोलिक विश्वासअनुसार पत्रुस प्रथम पोप थिए, तर तिनीपछि थुप्रै अन्य पोपहरू खडा हुनेछन्। आजको पोपले आफू यस संसारमा ख्रीष्टको प्रतिनिधि र मण्डलीको दृश्यमान शिर हुँ भनेर विश्वास गर्दछ। के तपाईं यो विश्वास गर्नुहुन्छ?

प्रभु येशूले यस संसारमा उहाँको स्थान लिनको लागि कसैलाई रोज्नुभएकै हो। यूहन्ना १६:७-१६ र यूहन्ना १४:१६-१८ अनुसार, यस संसारमा आफ्नो स्थान लिनलाई ख्रीष्टले कसलाई चुन्नुभयो –पत्रुस कि अरू कोहीलाई? ___________________________________ एफेसी १:२०-२२ र कलस्सी १:१८ अनुसार, मण्डलीको शिर को हुनुहुन्छ? ____________________________________ एफेसी ४:५ अनुसार, मण्डलीका कतिजना प्रभुहरू छन्? मण्डलीको केवल एउटै प्रभु र एउटै शिर हुनुहुन्छ! मण्डलीको अदृश्यमान शिर ख्रीष्ट हुनुहुन्छ तर यस संसारमा दृश्यमान शिरको रूपमा अरु कुनै पनि मानिस छैन। उहाँ नै मण्डलीको निर्माता हुनुहुन्छ, मण्डलीको मालिक हुनुहुन्छ र मण्डलीको शिर हुनुहुन्छ। जुन कुरा केवल उहाँको मात्र हो, त्यस कुरालाई हामी उहाँबाट खोस्न चाहन्नौं।

“पोप” भन्ने शब्द ल्याटिन भाषाको पापा (papa) भन्ने शब्दबाट आउँछ, जसको अर्थ “पिता” हुन्छ। कुनै एउटा मान्छेलाई सम्बोधन गर्दा यो शब्द प्रयोग गर्ने बारेमा प्रभु येशूले के भन्नुभयो (हेर्नुहोस मत्ती २३:९)? ______________________________________ ______________________________________


कहिलेकाहीँ पोपलाई “पवित्र पिता” भनेर पनि सम्बोधन गर्ने गरिन्छ। के एक क्षणभङ्गुर मानिसलाई यस्तो उपमाद्वारा सम्बोधन गर्नु ठीक हुन्छ जस्तो तपाईंलाई लाग्छ (यूहन्ना १७:११ सित तुलना गर्नुहोस्)? _________________

कहिलेकाहीँ समाचारहरूमा वा अन्य ठाउँहरूमा पोपलाई “पोन्टिफ” (PONTIFF) भनेर सम्बोधन गरिएको तपाईंले सुन्न सक्नुहुन्छ। यो शब्दको शाब्दिक माने हो “पूल निर्माता”। पूल कुनै दुई स्थानहरूको बीचमा खडा हुन्छ र तपाईंलाई एक ठाउँबाट अर्कोमा जानको निम्ति मद्दत गर्छ। पोपले आफू परमेश्वर र मानिस बीचको पूल वा मध्यस्थ भएको दाबी गर्दछ। बाइबल अनुसार, परमेश्वर र मानिसको बीचमा एउटै मध्यस्थ को हुनुहुन्छ (१ तिमोथी २:५)? __________________________

अमोघत्व (Infallibility)

अमोघ शब्दको अर्थ हो गल्ती वा भूल गर्न नसक्‍ने, नचुक्‍ने वा अचूक, बेठीक वा भड्कालु हुन नसक्‍ने। क्याथोलिक चर्च र क्याथोलिक पोपहरू अमोघ हुन्छन् भनी क्याथोलिकहरूले विश्वास गर्दछन्। तर उनीहरूले कुन अर्थमा यसो भनेका हुन् सो बुझ्ने कोशिस गरौं:

“क्याथोलिक चर्च अमोघ छ भन्नुको अर्थ यो हो, कि पवित्र आत्माको विशेष सहयोगद्वारा मण्डलीले विश्वास वा नीतिशास्त्रहरूको शिक्षा सिकाउँदा वा विश्वास गर्दा उसले कुनै गल्ती गर्न सक्दैन। अमोघत्वको माने पोपले पाप गर्नै सक्दैन भन्नेचाहिँ होइन, तर विश्वास वा नीतिशास्त्रहरूको शिक्षा सिकाउने सवालमा, भूल गर्नबाट तिनी पवित्र आत्माद्वारा जोगाइँदछन् भन्ने हो। मण्डलीले केवल सत्यता मात्र सिकाउँछ। सबै ख्रीष्टियनहरूको शिक्षक पोपद्वारा मात्र मण्डलीले विश्वास वा नीतिशास्त्रहरूको शिक्षा सबै विश्वासयोग्यहरूले पक्रिराखुन् भनेर अचूक तरिकाले व्याख्या गर्दछ” (बाल्टिमोर क्याटेकिज्म, Baltimore Catechism)।

“पोपको अमोघत्व भन्नुको अर्थ यो हो, कि पोपले सम्पूर्ण मण्डलीको शिरको रूपमा विश्वास वा नीतिशास्त्रहरू बारेमा बोल्दाहुँदि, गलत कुरा सिकाउनै सक्दैनन्। अमोघत्व र पापहीनता (जसको अर्थ एउटा मानिसले पाप गर्न सक्दैन भन्ने हुन्छ) को बीचमा अलमल हुनुहुँदैन” — विलियम जे. कोगनद्वारा लिखित् अ ब्रीफ क्याटेकिज्म फर एडल्ट्स, पृ. ६१(William J Cogan, A Brief Catechism For Adults)।

अर्को शब्दमा भन्नुपर्दा, के विश्वास गर्ने (विश्वास) र कसरी व्यवहार गर्ने (नीतिशास्त्रहरू) भन्ने कुराहरू सिकाउँदा पोप अचूक रहन्छ (निजले भूल गर्दैन)।

पोपको अमोघत्वको सिद्धान्त एउटा “नयाँ” सिद्धान्त हो। यसलाई रोममा सन् १८७० मा भ्याटिकन काउन्सील जुटेर परिभाषित गरेको थियो। उनीहरूको परिभाषा यस्तो छ:

“…हामी यो सिकाउँछौं र परिभाषित गर्छौं कि यो ईश्वरीय तवरले प्रकट गरिएको आधिकारिक सिद्धान्त हो कि रोमन पोन्टिफ, जब उहाँ एक्स-क्याथिड्रा (ex-cathedra) रूपमा बोल्नुहुन्छ, भन्नुको तात्पर्य, जब उहाँ सबै ख्रीष्टियनहरूका पास्टर र शिक्षकको भूमिका निर्वाह गर्ने कामको कार्यान्वयन गर्नुहुन्छ, उहाँको सर्वोच्च प्रेरितीय अधिकारको हैसियतले जब उहाँले विश्वास र नैतिकताको सम्बन्धमा कुनै सिद्धान्तलाई परिभाषित गर्नुहुन्छ, त्यतिखेर उहाँ धन्य पत्रुसको स्थानमा उहाँलाई प्रतिज्ञा गरिएको ईश्वरीय सहायताद्वारा, उहाँको साथमा त्यो अमोघत्व हुने गर्छ जसद्वारा आफ्‍नो मण्डली आभूषित होस् भनेर ईश्वरीय उदारकर्ताले इच्छा गर्नुभयो यस हेतुले कि उसले विश्वास र नैतिकताको सम्बन्धमा रहेका सिद्धान्तहरूको प्रतिरक्षा गर्न सकोस्, र त्यसैकारण रोमन पोन्टिफका ती परिभाषाहरू, मण्डलीको समर्थनको आधारमा नभएर, आफैमा सुधारको घेरा भन्दा बाहिर छन्।”

उपर्युक्त परिभाषाबाट ध्यानपूर्वक टिपोट गर्नुपर्ने त्यहाँ तीन ओटा कुराहरू छन्:

  1. पोपले बोलेको हरेक अभिव्यक्ति अमोघ वा अचूक हुन्छ भनी दाबी गरिएको छैन, तर उनले एक्स क्याथिड्रा (ex-cathedra) बोलेको कुराहरूको निम्ति मात्र, अर्थात् प्यापल कुर्सी (papal chair) वा सन्त पत्रुसको आसनमा बसेर मण्डलीको शिरको रूपमा तिनको औपचारिक हैसियतमा बोलिएका कुराहरू।
  2. घोषणा गरिएको अभिव्यक्तिहरू सम्पूर्ण मण्डलीलाई बाँध्‍ने उद्देश्यका साथ नै गरिनुपर्छ। मण्डलीभित्रका कुनै निश्चित समूहहरूलाई उनीहरूको स्थानीय तहको अवस्थाहरूसँग धेरै वा थोरै सम्बन्धित रहेर गरिएका अभिव्यक्तिहरूका सवालमा अमोघत्वको दावी गरिएको छैन।
  3. घोषणा गरिएका अभिव्यक्तिहरू “विश्वास र नीतिशास्त्रहरू” सँग सम्बन्ध राख्‍ने मात्र हुनुपर्छ। विश्वास भनेको मण्डलीले गर्ने विश्वाससँग सरोकार राख्‍ने कुरा हो र नीतिशास्त्रहरू भनेको मण्डलीले गर्ने व्यवहारसँग सरोकार राख्‍ने कुरा हो।

के कुनै मानिस अचूक हुन सम्भव छ? के पत्रुस अचूक थिए? के तपाईं अचूक हुनुहुन्छ? के तपाईंको पास्टर अचूक हुनुहुन्छ? के पास्टरले सत्यता नभएका कुराहरू प्रचार गर्न सम्भव छ? हरेक विश्वासीलाई आफूलाई सिकाइएको कुरा सत्य छ भनी कसरी निश्चय हुन सक्छ (हेर्नुहोस् प्रेरित १७:११)? ____________________________________ के तपाईंले यसो गर्ने गर्नुहुन्छ?

कुनै पोप, पूजाहारी, पास्टर वा अन्य कुनै पनि मानिस अचूक हुँदैन। मानिसहरू भू_______ पर्न सक्छन् भनी प्रभु येशूले स्पष्ट पार्नुएको छ (मत्ती २२:२९)। एउटा सामान्य मानिसमात्र भएकोले कोही पनि त्रुटिहीन छैन तर…

  1. परमेश्वर अचूक हुनुहुन्छ। उहाँले भूल गर्नुहुन्न र उहाँले जे सत्य छ त्यही मात्र सिकाउनुहुन्छ।
  2. परमेश्वरको वचन अचूक छ। यसमा भूलहरू छैनन् र यसले जे सत्य छ त्यही मात्र सिकाउँदछ।

विश्वास (के विश्वास गर्नुपर्छ) र नीतिशास्त्रहरू (कसरी व्यवहार गर्नुपर्छ) को सवालमा परमेश्वरले हामीलाई कुनचाहिँ अचूक मार्गदर्शक दिनुभएको छ –हेर्नुहोस् २ तिमोथी ३:१६-१७)? __________________________________ एउटा मानिसले परमेश्वरको वचनसँग सहमत हुँदै त्यस अनुसार अभ्यास गरुन्जेल मात्र अचूक हुन्छ। मण्डलीले परमेश्वरको वचनसँग सहमत हुँदै त्यस अनुसार अभ्यास गरुन्जेल मात्र अचूक हुन्छ। तपाईं कतिसम्म अचूक हुनुहुन्छ? तपाईंको मण्डली कतिसम्म अचूक छ? तपाईं र तपाईंको मण्डली परमेश्वरको वचनसँग कतिसम्म नजिकमा टाँसिएर बस्छ?

क्याथोलिक मण्डलीले आफूलाई अचूक ठान्दछ र आफूसँग नियमहरू बनाउने र बदल्ने अधिकार छ भनेर पनि विश्वास गर्दछ: “मण्डलीसँग नियमहरू बनाउने र बनाइएका नियमहरू बदल्ने परमेश्वरबाटको अधिकार छ। नियमहरू बनाउने यो अधिकार प्रेरितहरूका उत्तराधिकारीहरू, अर्थात् विशपहरूद्वारा अभ्यास गरिन्छ, र विशेषगरी, प्रेरितहरूका प्रमुख, अर्थात् सन्त पत्रुसको उत्तराधिकारी पोपको हातमा विश्वव्यापी मण्डलीका निम्ति नियमहरू बनाउने अधिकार हुन्छ” (बाल्टिमोर क्याटेकिज्म)।

चट्टान को हो?

यी सबै क्याथोलिक शिक्षाहरू मत्ती १६:१८ को उनीहरूको बुझाइमाथि आधारित छन्। पत्रुस नै चट्टान हुन् भनी उनीहरू विश्वास गर्छन्। यो कुरा साँच्चै यस्तै हो कि होइन भनी पवित्रशास्त्रहरूमा खोजी गरौं।

१ कोरिन्थी १०:४ मा महान् चट्टानको उल्लेख छ। यो चट्टान को हुनुहुन्छ? _______________ मत्ती २१:४२ पढ्नुहोस्। यस पदमा प्रभु येशूले एउटा महान् चट्टानको बारेमा बताउनुभयो जो रद्द गरिनुभयो र शिर वा कुनाढुङ्गा हुनुभयो। प्रेरित ४:१०-१२ मा पत्रुस उही चट्टानको उल्लेख गर्छन्। के पत्रुसले यहाँ आफैंलाई चट्टानको रूपमा इङ्गित गरेका थिए? ____________ तिनले कसलाई इङ्गित गरेका थिए?________________________

१ पत्रुसको पुस्तक कसले लेखे? _________________ १ पत्रुस २:४-७ पढ्नुहोस्। पत्रुसले ४ पदमा र ६ पदमा पनि पत्थरको उल्लेख गर्छन्। के त्यहाँ तिनले आफूलाई इङ्गित गरेका थिए? ________________

सबै विश्वासीहरू यस महान् भवन अर्थात् मण्डलीको अंश हुन् भनी पत्रुसले ५ पदमा मानिलिएका छन्। मण्डली भनेको “आत्मिक घर” हो जुनचाहिँ ईंट्टाहरू वा काठहरू वा सिमेन्टले होइन, तर “जिउँदो पत्थरहरू” (विश्वासीहरू) ले बनेको हुन्छ। हरेक विश्वासी यस महान् भवन, अर्थात् मण्डलीमा एउटा जिउँदो पत्थर हो। के तपाईं यस भवनको अंश हुनुहुन्छ? के पत्रुस यस भवनको एउटा अंश थिए? के पत्रुस आफैं नै कुनाढुङ्गा थिए (६-७ पदहरू तुलना गर्नुहोस्)? ________________

१ पत्रुस २:४-७ को आधारमा “ठीक” वा “बेठीक” लेखेर जवाफ दिनुहोस्:

१ कोरिन्थी ३:११ अनुसार मण्डलीका एउटै मात्र जग को हुनुहुन्छ? ________________________ अङ्ग्रेजीको एउटा भजनले यस्तो भन्दछ, “मण्डलीको एउटै जग येशू ख्रीष्ट हाम्रा प्रभु हुनुहुन्छ।” उक्त भजनले यस्तो भन्दैन, “मण्डलीको एउटै जग पत्रुस हुन्।” मण्डली पत्रुसमाथि होइन, तर ख्रीष्टको र उहाँको वचनको चट्टानसरह बलियो जगमाथि बनाइएको छ।

पुरानो नियममा करिब ३४ पटक परमेश्वरलाई चट्टान भनी भनिएको छ। व्यवस्था ३२:३-४ अनुसार, चट्टान को हुनुहुन्छ? ______________________ २ शमूएल २२:२,३,३२,४७ पढ्नुहोस्। चट्टान को हुनुहुन्छ? ______________________ विश्वासी जनले सँधैभरी सम्झनामा राख्नुपर्ने एउटा कुरा के हो (भजनसङ्ग्रह ७८:३५)? _________________________________ख्रीष्टलाई हाम्रो चट्टान र कुनाढुङ्गाको रूपमा सङ्केत गर्ने पुरानो नियममा तीनओटा अगमवाणीहरू पनि छन्। हेर्नुहोस् यशैया ८:१४; २८:१६ र भजनसङ्ग्रह ११८:२२।

को? म?

मानौं पत्रुस प्रथम पोप थिए। तर तिनी आफैं सो जान्दैनथे! लूका ५:८ मा पत्रुसले आफूलाई कसरी वर्णन गरे? _____________________________________ के पत्रुसले मानिसहरूबाटको श्रद्धा र उपासनालाई स्वीकार गरे? के पत्रुसले कसैलाई उनको सामु घुँडा टेक्‍न दिए (प्रेरित १०:२५-२६ हेर्नुहोस)? _______________

(टिप्पणी: पोपहरूले त्यस्तो श्रद्धा स्वीकार गर्ने मात्र होइन माग नै गर्छन्। यहाँसम्म कि निकै उच्च ओहोदाका पादरीहरूले समेत, नव नियुक्त पोपको सामु भुईंमा लम्पसार परेर साष्टाङ्ग दण्डवत गर्दछन्, वा अभिषेक गरेपछि तिनको सामु शपथ खाएर तिनको खुट्टालाई चुम्बन गर्दछन्। पोपहरूले “पवित्र पिता” को उपाधि आफूले अधिकारमै पाएझैं गरी स्वीकार पनि गर्छन्। के कहिल्यै पत्रुसलाई “पवित्र पिता” भनेर बोलाइएको थियो र?)

मत्ती १६:१८ मा पत्रुसलाई पोप नियुक्त गरिएको हो भनेर क्याथोलिकहरू विश्वास गर्दछन्। मत्ती १६:१८ पछिका पदहरूलाई पढ्नुहोस्। विशेष गरी मत्ती १६:२१-२३ पढ्नुहोस्। यहाँ प्रभु येशूले पत्रुसलाई कडासँग हप्काउनुभएको कुरा पाउँछौं! भर्खरै मात्र पोप नियुक्त भएको मान्छेका विरुद्ध निकै कडा वचन छ यहाँ! २२ पदमा के पत्रुसले तिनी चुक्‍न सक्छन् भनी प्रमाणित गरे कि अचूक छन् भनी? _______________ गलाती २:११-१४ पढ्नुहोस्। यहाँ प्रेरित पावलले प्रेरित पत्रुसलाई कडासाथ हप्काउनुपर्‍यो किनभने पत्रुसले गल्ती गरेका थिए! (तिनी अचूक थिएनन्)।

पत्रुस परमेश्वरका एक ठूला सेवक थिए र प्रभुले तिनलाई सुन्दर तरिकाले प्रयोग गर्नुभयो। पेन्टिकोस्टको दिनमा हजारौं मानिसहरूलाई प्रचार गर्ने व्यक्ति पत्रुस नै थिए (प्रेरित २)। यहूदीहरू (प्रेरित २), सामरीहरू (प्रेरित ८) र अन्यजातिहरू (प्रेरित १०) का सामु विश्वासको ढोका खोलिदिने व्यक्ति पत्रुस नै थिए । वास्तवमा, प्रेरितको पुस्तकका पहिलो १२ अध्यायहरूमा मुख्य र महत्त्वपूर्ण भूमिका पत्रुसकै थियो। उनी परमेश्वरका एक महान् सेवक थिए र ख्रीष्टको सर्वोत्तम दास थिए तर तिनी पोप थिएनन् न ता तिनी अचूक नै थिए। प्रेरितको पुस्तकको पछिल्लो आधा भाग (१३-२८ अध्यायहरू) मा पत्रुसको बारेमा बिरलै उल्लेख छ। यहाँ मूलत: पावलको उल्लेख छ। पत्रुस नै प्रथम पोप भएका भए प्रेरितको पुस्तकमा तिनको अझै धेरै उल्लेख हुनुपर्ने थिएन र?

फेरि मत्ती १६ अध्यायमा फर्कौं। विशेष गरी १३-१७ पदहरूलाई विचार गर्नुहोस्। यी पदहरूले ख्रीष्टको व्यक्तित्वलाई जोड दिन्छन् कि पत्रुसलाई? यी पदहरूले ख्रीष्टको को हुनुहुन्छ भनेर दर्शाउँछन् कि पत्रुस को हुन् भनेर? पत्रुसले आफ्‍नो महानतालाई स्वीकार गरे कि ख्रीष्टको महानतालाई (१६ पद)? ________________________ यी पदहरूको मुख्य विषयवस्तु पत्रुस होइन ख्रीष्ट हुनुहुन्छ।

शब्दको खेल: पेट्रोस् र पेट्रा

मत्ती १६:१८ एक प्रकारको श्‍लेषोक्ति हो। यहाँ दुईओटा उस्तै-उस्तै शब्दहरूको प्रयोग गरिएको छ। येशूले भन्नुभयो, “तिमी पत्रुस (ग्रीक शब्द पेट्रोस् हो) हौ, र यस चट्टानमाथि (ग्रीक शब्द पेट्रा हो) म आफ्नो मण्डली बनाउनेछु।” अर्को शब्दमा, उहाँ यसो भन्दै हुनुहुन्थ्यो, “तिमी पेट्रोस् हौ र यस पेट्रामाथि म आफ्नो मण्डली बनाउनेछु।”

यी ग्रीक शब्दहरूको अर्थको बारेमा बिचार गरौं:

१) पेट्रोस्

एउटै नेपाली शब्दले “पेट्रोस” लाई व्याख्या गर्ने हो भने त्यो शब्द “पत्थर” हो। हेर्नुहोस यूहन्ना १:४२ (पत्रुस=केफास=पत्थर)। चट्टानको एक टुक्रालाई पत्थर भनिन्छ। तसर्थ सामान्यतया यो शब्दले कुनै खुकुलो पत्थर वा हल्लाउन सकिने पत्थरलाई जनाउँछ, जसलाई एउटा मानिसले अन्यत्र फ्याँक्‍न पनि सक्छ। यो शब्दले कहिलेकसो अति ठूलो पत्थरलाई जनाउन पनि सक्छ, तर प्राय: जसो यस शब्दले सानो, हल्लाउन सकिने पत्थरलाई जनाउँछ। यो शब्द लाइटरमा प्रयोग गरिने पत्थर र घुयेंत्रोमा प्रयोग गरिने ढुङ्गाहरू जनाउन पनि प्रयोग गरिएको छ। यो शब्दलाई व्यक्ति वा वस्तुको नामको रूपमा पनि प्रयोग गरिएको छ (पत्रुस)। के पत्रुसले आफूलाई पत्थरको रूपमा हेरे (१ पत्रुस २:५)? ____________ के एउटा खुकुलो पत्थरमाथि मण्डली बनाउनु बुद्धिमानी हुन्छ? के एउटा भवन स-साना ढुङ्गाहरूमाथि बसालिनु सम्भव छ? के यो एउटा बलियो जग हुन सक्ला?

२) पेट्रा

एउटै नेपाली शब्दले “पेट्रा” लाई व्याख्या गर्ने हो भने त्यो शब्द “चट्टान” हो। (मत्ती १६:१८—“यस चट्टानमाथि”)। कुनचाहिँ ठूलो हुन्छ, चट्टान कि पत्थर? __________ पेट्रा शब्दको अर्थ हो ठूलो चट्टान वा पहरा सरह चट्टान। प्राय: जसो यो शब्दलाई कुनै अचल, स्थायी चट्टान वा हल्लाउन नसकिने चट्टानलाई जनाउन प्रयोग गरिन्छ। प्राय: जसो यो शब्दलाई समुद्रछेऊको चट्टानी भीरलाई (चट्टान, पहरा) जनाउन प्रयोग गरिएको छ। मण्डली एउटा विशाल, ठोस्, अचल र स्थायी चट्टानमाथि बनाइएको छ! यो जग यति ठोस र यति सुरक्षित छ कि “नरकका ढोकाहरू यसमाथि विजयी हुनेछैनन्” (मत्ती १६:१८)।

पत्रुसले भर्खरै सुस्पष्ट साथ स्वीकार गरेका छन्। तिनले येशू ख्रीष्ट र उहाँ को हुनुहुन्थ्यो भनेर देखाइसकेका छन् (मत्ती १६:१६)। पत्रुसले भर्खरै मात्र स्वीकार गरेको सत्यतामा नै त्यो बलियो चट्टानको जग देखिनुहुन्छ जसमाथि ख्रीष्टको मण्डली बनिनेवाला थियो। ख्रीष्ट नै निर्माता हुनुहुन्थ्यो, ख्रीष्ट नै मालिक हुनुहुन्थ्यो (यो उहाँको मण्डली हो) र ख्रीष्ट नै बलियो चट्टान सरहको जग हुनुहुन्थ्यो (१ कोरिन्थी ३:११)।

मण्डली पत्रुसभन्दा पनि बलियो एकजनामाथि बनिएको छ भन्ने कुरामा के तपाईं धन्यवादी हुनुहुन्छ? मण्डलीको शिर कुनै दृश्यमान, त्रुटिपूर्ण, पापपूर्ण मानिस नभएर ख्रीष्ट नै हुनुहुन्छ भन्ने कुरामा तपाईं धन्यवादी हुनुहुन्छ? मण्डली मानिसद्वारा र मानिसमाथि नभएर परमेश्वरद्वारा परमेश्वरमाथि बनिएको छ भन्ने कुरामा के तपाईं धन्यवादी हुनुहुन्छ?

मानिसहरूले मानवीय अगुवाहरू र मानवीय शिरहरूलाई हेर्नुमा त्यहाँ ठूला खतराहरू छन्। के मानिसहरूले हामीलाई निराश बनाउन सक्छन्? के मानिसहरूले भूल गर्न सक्छन्? के मानिसहरूले कमसल निर्णयहरू गर्न सक्छन् (यर्मिया १७:५)? यदि पास्टर नै मण्डलीको शिर भएको भए, हाम्रो माझमा कस्ता समस्याहरू हुने थिए? के हाम्रो अगुवा र हाम्रो शिर कुनै मानिस मात्र भइदिएको भए हामीहरू ठूलो समस्यामा पर्ने थियौं।

के तपाईंको मण्डली मानिसद्वारा चलाइएको छ कि परमेश्वरद्वारा? के तपाईंको मण्डलीको नेतृत्व मानिस (वा मानिसहरू) द्वारा भएको छ कि परमेश्वरद्वारा? यो मण्डली कसको हो (मत्ती १६:१८ सित तुलना गर्नुहोस्)? मण्डलीले कसको आज्ञापालन गर्नुपर्छ, परमेश्वरको कि मानिसको (प्रेरित ४:१९ र ५:२९ सित तुलना गर्नुहोस्)? मण्डलीले कसलाई पछ्याउनुपर्छ, मानिसलाई कि परमेश्वरलाई? यदि कसैले _____________ देखासिकी गरिरहेको छ भने मात्र हामीले निजलाई पछ्याउनुपर्छ (१ कोरिन्थी ११:१)।

तपाईंको जग कत्तिको बलियो छ?

तपाईंमुनिको जमिन कत्तिको बलियो छ? के तपाईं सुरक्षित र बलियो जगमाथि खडा हुनुहुन्छ? चट्टानमाथि आफ्नो जीवन बसाल्न तपाईंले के गर्नुपर्छ (मत्ती ७:२४-२७)? के तपाईं यसो गर्दै हुनुहुन्छ? यदि गर्दै हुनुहुन्छ भने, नहल्लिनुहोस् र नभड्किनुहोस्! बलियो जगमाथि रहिरहनुहोस् किनभने अन्य सबै जमिन भासिरहेको बालुवा मात्र हुन्। हेर्नुहोस् १ कोरिन्थी १५:५८।

यो सत्य हो, मानिसहरूले मण्डली बनाउन सक्छन्। मानिसहरूले अन्य मानिसहरूलाई एउटा भवनभित्र जम्मा गर्न सक्छन्। मानिसहरूले आफूलाई जे मन लाग्यो त्यही सिकाउन सक्छन्। मानिसहरूद्वारा र मानिसहरूमाथि बनाइएका त्यहाँ थुप्रै-थुप्रै मण्डलीहरू छन्। तर तिनीहरूको कुनै बलियो चट्टानको जग छैन र तिनीहरूका भवनहरू रहिरहनेछैनन्। चार्ल्स स्पर्जन (Charles Spurgeon) ले यसरी भनेका छन्:

“यस हप्ता म एउटा चर्चघरको सामु उभिएको थिएँ जो एक समय समुद्री किनाराबाट निकै पर अवस्थित थियो, तर अहिले यो समुद्रको छेवैमा खडा रहेको छ। प्राय: हरेक वर्ष विशाल मात्रामा माटोको भीर समुद्रमा खस्छ, र एक वा दुई वर्षमा यो मण्डली पनि खस्‍नैपर्छ। अहिले त यो निश्चिन्त र शान्त भएर उभिरहेको छ, तर कुनै निश्चित दिनमा यो समुद्रभित्र निलिनेछ। म यो सोच्न बाध्य भएको छु, कि उक्त भवनले केही निश्चित प्रकारका कथित मण्डलीहरूलाई जनाउँछ, जोहरू कुनै शासनप्रथा वा अन्धविश्वासको माटेभीरमाथि उभिएका छन्। मानिसहरूले पाएको प्रकाशको छाल र त्योभन्दा पनि, परमेश्वरको आत्माको समुद्री छाल आउँदैछ र तिनीहरूका जगहरूलाई क्लान्त पार्दैछ र अन्त्यमा एकदिन त्यसको पूर्ण संरचना भत्कनैपर्छ। त्यसपछि के? के हामी यसो भन्दै कराऔं, “परमेश्वरको मण्डली भत्कियो?” यस्तो मूर्ख उच्चारण टाढै रहोस्; परमेश्वरको मण्डली अति सुरक्षित छ। यसो नजर लगाउनुहोस्, त्यहाँ परमेश्वरको मण्डली आँधीबेह्रीले पूर्ण अन्तरीप (समुद्रमा देखिने अग्लो चट्टान) माथि खडा रहिरहेको छ, जहाँ समुद्र अटुट रूपमा उर्लेर आउँछ र हरेक छेऊबाट सँधै धक्का दिन्छ। तरैपनि त्यसले कुनै क्षतिको डर मान्दैन, किनभने त्यो कुनै माटेभीरमा बनाइएको छैन, तर चट्टानमाथि बनाइएको छ जसमाथि नरकका छालहरू विजयी हुनेछैनन्। जीवित परमेश्वरको मण्डली खडा रहनेछ (मत्ती १६:१८)।”

यो अध्ययन माला मीडलटाउन बाइबल चर्चद्वारा प्रकाशित सामग्रीबाट नेपालीमा अनुवाद गरिएको हो। यसलाई अध्ययन गर्दा ट्रिनिटेरियन बाइबल सोसाइटी (TBS) द्वारा प्रकाशित पवित्र बाइबल प्रयोग गर्नुभयो भने तपाईंलाई सहज हुनेछ। तपाईंलाई एकमात्र सत्य परमेश्वर र उहाँका पुत्र प्रभु येशू ख्रीष्टको व्यक्तिगत ज्ञानमा आइपुग्न र त्यसमा बढ्दै-बढ्दै जान पवित्र आत्माले यी अध्ययनहरूलाई प्रयोग गर्नुभएको होस्! (१ पत्रुस २:२; २ पत्रुस ३:१८)